გორის ცენტრალური სტადიონი ევროპული მატჩებისთვის ემზადება

სამშაბათს, 5 ივლისს უეფას ჩემპიონთა, ევროპის და კონფერენს ლიგის მატჩები აიღებს სტარტს.

გორის “დილა” ” უეფას კონფერენს” ლიგაზე პირველი საკვალიფიკაციო ეტაპიდან ჩაერთვება და მისი მეტოქე ფინური “კუპსი” იქნება.

პირველი შეხვედრა 7 ივლისს, თბილისის დროით 20:00 საათზე ფინეთში გაიმართება.

განმეორებითი შეხვედრა კი გორში, თენგიზ ბურჯანაძის სახელობის სტადიონზე 14 ივლისს, საღამოს ცხრა საათიდან დაიწყება.

აღსანიშნავია, რომ გორის “დილას” მატჩის გარდა, თენგიზ ბურჯანაძის სახელობის სტადიონი “საბურთალო” თბილისი – “პარტიზანი” ტირანას შეხვედრასაც უმასპინძლებს, რადგან მიხეილ მესხის სახელობის სტადიონზე, რომელზეც “საბურთალო” საშინაო შეხვედრებს მართავს, სარემონტო სამუშაოები მიმდინარეობს.

გორში გასამართი შეხვედრა 7 ივლისს, 20:00 საათიდან დაიწყება და მატჩზე დასასწრები ბილეთების შეძენა, რომლებიც 1 და 2 ლარი ღირს, Tkt.ge-ზე იქნება შესაძლებელი. უშუალოდ მატჩის დღეს იმუშავებენ სტადიონის სალაროებიც.

განმეორებით შეხვედრას “საბურთალო” 14 ივლისს ალბანეთში გამართავს. მატჩი 22:00 საათზე დაიწყება.

შეგახსენებთ, რომ “საბურთალოს” და “დილას” გარდა, ევროსარბიელზე იასპარეზებენ თბილისის და ბათუმის “დინამოებიც”.

თბილისის “დინამოს” მეტოქე ევროპის კონფერენს ლიგაზე ესტონური “პაიდე” იქნება, ხოლო ბათუმის “დინამო” სლოვაკეთის წარმომადგენელ “სლოვანს” დაუპირისპირდება.