2020 წლის საპარლამენტო არჩევნების შემდეგ, გიორგი ხოჯევანიშვილი გორი-კასპის მაჟორიტარი დეპუტატია. არჩევნების შემდეგ, ის ოპოზიციაში გადასულ გახარიას გუნდს შეუერთდა და პარტიის "საქართველოსთვის" პოლიტსაბჭოს წევრი გახდა.
პირველ რიგში, გვითხარით, როგორ გრძნობთ თავს ოპოზიციაში?
განურჩევლად იმისა, თუ რა პოლიტიკური შეხედულების ვიყავი, ყოველთვის ვემსახურებოდი ჩემს ქვეყანას და ვემსახურები დღესაც. დარწმუნებული ვარ, რომ ჩემი საქმიანობა ოპოზიციის ფლანგზეც შედეგიანი იქნება.
რა შეფასებას გააკეთებთ მიმდინარე პოლიტიკურ პროცესებთან დაკავშირებით – რა ხდება დღეს ქვეყანაში და რას უპასუხებთ ბიძინა ივანიშვილს, რომელმაც თქვა რომ გახარია მოღალატეა?
პირველივე დღიდან, როდესაც ჩვენ პოლიტიკური შეხედულებების შესახებ ღიად საუბარი დავიწყეთ, წამოვიდა ბრალდებების ნიაღვარი. რა თქმა უნდა, ეს არის ცრუ ბრალდებები, ეს არის არასერიოზული დამოკიდებულება და საზოგადოების აბუჩად აგდება. ჩვენ ამ ყველაფერს საქმის კეთებით და ჩვენი გეგმებით ვპასუხობთ. იმ გეგმებით, რომელიც ქართულ საზოგადოებას აინტერესებს. ჩვენ არანაირად არ ვაპირებთ ამ პოლიტიკურ კინკლაობაში მონაწილეობის მიღებას, რადგან ჩვენი ქვეყანა ძალიან ბევრი პრობლემის წინაშე დგას, რაზეც დროული რეაგირებაა საჭირო. ის კინკლაობა, რომელსაც დღეს საზოგადოება ხედავს, სრულიად უსარგებლო, არაფრის მომცემია საზოგადოებისთვის და ამ პროცესის სიღრმესა და უფსკრულში ჩაყოლას არ ვაპირებთ.
გასაგებია, თუმცა ერთგვარ დაბნეულობასაც იწვევს ეს ყველაფერი საზოგადოებაში. გორი-კასპის მაჟორიტარი დეპუტატი, რომელმაც გასულ საპარლამენტო არჩევნებზე კენჭი „ქართული ოცნების“ სახელით იყარა და გაიმარჯვა, დღეს გამოდის და ამბობს, რომ „ოცნება 2“ არ ვართო. როგორ უნდა დარწმუნდეს საზოგადოება ამ განცხადების ნამდვილობაში? მითუმეტეს ამბობთ, რომ არავის წინააღმდეგ არ გამოდიხართ?
ჩვენ ვერთიანდებით საქართველოსთვის, არავის წინააღმდეგ. ეს საერთოდ არ ნიშნავს, რომ არავის არ გავაკრიტიკებთ. რა თქმა უნდა, გავაკრიტიკებთ, მათ შორის „ქართულ ოცნებასაც“. ვინც ამას დაიმსახურებს ჩვენგან, მიიღებს ჯანსაღ და საქმიან კრიტიკას და არა იმ ჭორაობის ნიადაგს, რომელსაც დღეს აქვს ჩვენს მიმართ ადგილი.
მაშინ გვითხარით, რატომ იყავით „ქართულ ოცნებაში“? რა იყო მთავარი პრიორიტეტი?
2018 წელს მე დავთანხმდი „ქართული ოცნების“ შემოთავაზებას გუბერნატორის პოზიციაზე. ეს იყო ჩემთვის ძალიან დიდი პასუხისმგებლობა, იმ დროისთვის მნიშვნელოვანი გამოწვევა, რომ ჩემ მშობლიურ რეგიონში გუბერნატორის პოზიციაზე მემუშავა. დამეთანხმება საზოგადოება ალბათ, რომ მე ჩემი შესაძლებლობების მაქსიმუმი გავაკეთე მაშინ. შემდგომში აისახა კიდეც არჩევნებზე, როდესაც მაჟორიტარობის კანდიდატი ვიყავი და გავიმარჯვე პირველივე ტურში, რა თქმა უნდა, გუნდის მხარდაჭერით. მაგრამ არ უნდა დაგვავიწყდეს, რომ ამ გუნდის ლიდერი და პირველი ნომერი იყო გიორგი გახარია და დღეს ეს ადამიანი აღარ არის ამ გუნდში.
გიორგი გახარიას გამო იყავით „ქართულ ოცნებაში?
გიორგი გახარია, რა თქმა უნდა, მნიშვნელოვანი ფაქტორი იყო, არამარტო ჩემთვის, არამედ იმ ამომრჩევლისთვისაც, ვინც „ქართულ ოცნებას“ ხმა მისცა 2020 წელს. მე, როგორც ერთ-ერთი რიგითი მოქალაქე, ამ რეგიონის მკვიდრი, ვიყრიდი კენჭს „ქართული ოცნებიდან“, მაგრამ ამ ყველაფრის უკან, რა თქმა უნდა იდგა, ჩემი, ჩემი წინაპრების, ჩემი ოჯახის ავტორიტეტი. ამ ყველაფერში თავის წვლილი „ქართულმა ოცნებამაც“ შეიტანა, თუმცა კიდევ ერთხელ ხაზგასმით აღვნიშნავ, რომ ამ პარტიის რეიტინგსა და გამარჯვებაში, ერთის მხრივ, თავისი წვლილი შეიტანა სიის პირველმა ნომერმა, გიორგი გახარიამ და მეორეს მხრივ, ბიძინა ივანიშვილმა, რომელმაც ღიად განაცხადა, რომ ის „ქართული ოცნებისგან“ არის დისტანცირებული და მასთან აღარანაირი შეხება აღარ აქვს.
თქვენ გჯერათ ამის?
ამას მოვლენები დაადასტურებს ან უარყოფს მომავალში. ასე, რომ ნუ გავუსწრებთ მოვლენებს წინ. ვნახოთ, მივყვეთ პროცესებს.
თქვენ ერთ-ერთ განცხადებაში თქვით, რომ „ოცნება“ ხალხს დაშორდა. როდის მიხვდით ამას და ამის რა მაგალითების დასახელება შეგიძლიათ?
როდის მივხვდით და მას შემდეგ, რაც საზოგადოების საჭიროებებზე ფიქრი შემცირდა “ქართულ ოცნებაში“ და მხოლოდ საკუთარ პარტიულ ინტერესებზე იყო მორგებული ესა თუ ის გადაწყვეტილება. ასევე იმ პერიოდში, როდესაც იყო კრიტიკული მომენტი, როდესაც ხდებოდა ნიკანორ მელიას დაკავება. არ უნდა დაგვავიწყდეს, რომ ეს იყო ერთ-ერთი მნიშვნელოვანი ფაქტორი, აქ ვგულისხმობ მისი დაკავების ფორმას, დროს და ადგილს. მეორეს მხრივ, რა თქმა უნდა, სახელმწიფო ინსტიტუტებზე ძალადობის განმახორციელებელი ადამიანი უნდა დაისაჯოს, მაგრამ ყველაფერს თავისი ფორმა აქვს და ეს ქვეყნისთვის ზიანის მომტანი არ უნდა იყოს. ამ პერიოდშიც გამოიკვეთა, რომ საკუთარი პარტიული ინტერესები უფრო მაღლა დადგა, ვიდრე ქვეყნის ინეტერსები, როდესაც ჩვენი ქვეყნის პარტნიორები და მეგობრები ღიად მოუწოდებდნენ, რომ პოლიტიკური პარტიის ოფისში შეჭრით პოლიტიკოსის დაკავება, ეს იქნებოდა ქვეყნისთვის დამაზიანებელი. და რაც ძალიან მშნიშვნელოვანია, იმ პერიოდში „ნაციონალური მოძრაობის“ ოფისში იყო ძალიან მაღალი ემოციური ფონი. ღიად ცხადდებოდა, რომ არავინ აპირებდა ნიკანორ მელიას პოლიციისთვის ჩაბარებას. იქნებოდა წინააღმდეგობა და ამას რა მოყვებოდა კაციშვილმა არ იცის. შესაბამისად, ამ რისკზე წასვლა ქვეყნისთვის ძალიან დამაზიანებელი იქნებოდა. ესეც ერთ-ერთი განმაპირობებელი ფაქტორი იყო ჩვენი გადაწყვეტილების.
რაც შეეხება ადგილობრივ საკითხებს, გუბერნიის ინსტიტუტზეა საინტერესო თქვენი აზრი. ხომ არ ფიქრობთ, რომ თვითმმართველობებს ცენტრალურ ხელისუფლებასთან ისედაც შეუძლიათ კომუნიკაცია და გუბერნიის ინსტიტუტი სახელმწიფოსთვის არის ზედმეტად დახარჯული თანხა?
დღეს არსებული კანონმდებლობით, გუბერნიას ადგილობრივ და ცენტრალურ ხელისუფლებას შორის გარკვეული ხიდის და შუამავლის შესრულების ფუნქცია აქვს. გარკვეულ საკითხებს ეს ინსტიტუტი რეგიონში ზედამხედველობას უწევს. ჩემ შემთხვევაში გეტყვით, რომ დამატებითი პროექტების მოძიების კუთხით, ძალიან აქტიურად ვიყავი ჩართული და შიდა ქართლში მართლაც ბევრი პროექტი განხორციელდა ჩემი გუბერნატორობის პერიოდში, რომელიც ახლა სრულდება ან იწყება. შეიძლება ითქვას, რომ გუბერნიის ინსტიტუტის მუშაობის ეფექტურობა პერსონალიებზეც არის დამოკიდებული.
თქვენი გუბერნატორობის პერიოდში გამოქვეყნდა აუდიტის ანგარიში, სადაც კორუფციაზეც არის მინიშნება. აი, ასეთი ფაქტების აღმოფხვრაში თუ იყავით ჩართული და რა გააკეთეთ მაშინ თქვენი უფლებამოსილების ფარგლებში?
დეტალები არ მახსოვს იმ დროინდელი აუდიტის დასკვნის, თუმცა ეს ანგარიში ჩემ საქმიანობასთან არანაირად არ იყო დაკავშირებული და თუ კი მერიასთან იქნებოდა რაიმე ფორმით დაკავშირებული, თითოეულმა დამრღვევმა უნდა აგოს ძალიან მკაცრად პასუხი ასეთი ფაქტების რეალურად არსებობის შემთხვევაში.
კორუფციაზე გააკეთეთ აქცენტი პარტიის ყრილობაზე. რა შეგიძლიათ თქვათ შიდა ქართლზე, მათ შორის გორზეც. რა ვითარებაა ამ მხრივ ჩვენთან?
ჩვენი ამჟამინდელი გუნდის ხედვა ამ მიმართულებაზე საკმაოდ აქტუალურია. კონკრეტულ გეგმას და კონკრეტულ ნაბიჯებს ითვალისწინებს, ვგულისხმობ ანტიკორუფციული სამსახურის გაძლიერებას ქვეყანაში. იმის გათვალისწინებით, რომ ჩვენ ვფიქრობთ უფრო მეტ დეცენტრალიზაციას და უფრო მეტი უფლებამოსილების მინიჭებას თვითმმართველობებისთვის, ამის გათვალისწინებით, ანტიკორუფციული სამსახურები უნდა გახდეს უფრო მეტად ეფექტური, იმის გათვალისწინებით, რომ რაიმე რისკი რაც შეიძლება ადგილზე გაჩნდეს, ამაზე იყოს მყისიერი და მკაცრი რეაგირება.
მაშინ მოქალაქის პოზიციიდან გვიპასუხეთ, როდესაც გასულ წლებში სახელმწიფო ტენდერებში გორის მაშინდელი მაჟორიტარი დეპუტატის, იოსებ მაკრახიძის და მისი ოჯახის წევრების კომპანიები ლიდერობდნენ და მილიონობით ლარის ტენდერებს იგებდნენ, არ გიჩნდებოდათ კითხვები, მითუმეტეს აუდიტის ზემოთ ხსენებული ანგარიშიც ამ საეჭვო გარიგებებზე მიუთითებდა და განმარტავდა, რომ სატენდერო პირობები კონკრეტული კომპანიების შესაძლებლობებზე იყო მორგებული.
პირდაპირ გეტყვით, ამ კონკრეტულ შემთხვევაში, იმ დროისთვის ობიექტური კითხვები არ გაჩენილა ჩემი მხრიდან, რასაც ჰქონდა ერთადერთი მიზეზი – გამარჯვებული კომპანია არ ცხადდებოდა კონკრეტული მუნიციპალიტეტის მიერ, ეს იყო ცენტრალიზებული, კონტროლირებადი პროცესი სახელმწიფო შესყიდვების სააგენტოს მიერ. ეს არის აბსოლუტურად გამჭვირვალე პროცესი. ღიაა ყველა იმ კომპანიისთვის, ვისაც ტენდერში მონაწილეობის სურვილი ექნებოდა. შესაამისად, მე არ მახსენდება, რაიმე კონკრეტული კორუფციული რისკი ამ შემთხვევაში.
ანუ ფიქრობთ, რომ ამ მხრივ გორის მუნიციპალიტეტში ნორმალური ვითარებაა?
კი ბატონო.
დაახლოებით ერთი თვის წინ თქვენ განაცხადეთ, რომ გორის მერმა მოადგილეები პოლიტიკური ნიშნით გაათავისუფლა. საუბარია თქვენს თანაგუნდელებზე, ერასტი ელიჯარაშვილსა და პაატა ივაიშვილზე. კონკრეტულად რა ზეწოლას ჰქონდა მათ მიმართ ადგილი და რატომ ფიქრობთ?
მოსახლეობის დიდი ნაწილი, ვისაც მათთან შეხება ჰქონია, დამეთანხმება, რომ სხვადასხვა მიმართულებით განხორციელებული საქმეების შესრულების პროცესში იყვნენ გულისხმიერები და ხალხის სამსახურში და რაიმე პოლიტიკურ ნიშნებს არ ემსახურებოდა მათი საქმიანობა. რაც შეეხება მერის გადაწყვეტილებას, მას მოსთხოვეს მოადგილეების გათავისუფლება პარტიის ცენტრალური ოფისიდან, მხოლოდ და მხოლოდ იმის გამო, რომ ეს ადამიანები გიორგი გახარიას მიმართ საკუთარ შეხედულებებს გამოხატავდნენ. სწორედ ეს არის პოლიტიკური ნიშნით დევნა და შევიწროება. მე ვფიქრობ, რომ გორის მერის მხრიდან ეს იყო უღირსი გადაწყვეტილება.
თქვენ რა როლი გქონდათ ამ ადამიანების მერის მოადგილეებად დანიშვნის პროცესში?
გიდასტურებთ, გარკვეულწილად გავუწიე რეკომენდაცია
მაშინ აქვე ჩაგეკითხებით, არის თუ არა თვითმმართველობა დღეს დამოუკიდებელი და ნიშნავს თუ არა მის საქმიანობაში ჩარევას ასეთი რეკომენდაციები?
საბოლოო ჯამში, მერი იღებს გადაწყვეტილებებს და ის აწერს ხელს ამა თუ იმ ადამიანის დანიშვნასთან დაკავშირებულ ბრძანებებს. ანალოგიურად იყო მათთან მიმართებაშიც. თვითმმართველობის დამოუკიდებლობის ხარისხი გარკვეულწილად მერზეც არის დამოკიდებული.
სულ ახლახანს გამოჩნდა ყოფილი პარლამენტარი თამაზ შიოშვილი, რომელსაც „ქართული ოცნების“ გორის ოფისი ჩააბარეს. მისი განცხადებით, 2020 წელს, საარჩევნოდ, მართველი გუნდის რეალური მხარდამჭერები თქვენ სახლში გაუშვით და მხოლოდ თქვენი ახლობელბით დააკომპლექტეთ საარჩევნო შტაბი.
ეს არის არასერიოზული განცხადება თამაზ შიოშვილის მხრიდან. სავარაუდოდ, მოსთხოვეს ასეთი განცხადების გაკეთება და როგორც ჩანს, დაუფასეს კიდეც, პარტიაში რაღაც თანამდებობაზე დანიშნეს. წარმატებებს ვუსურვებ პიროვნულად, თუმცა ვურჩევდი, რომ ჭორაობა არ არის სწორი და ეთიკური, რაიმე კონკრეტული ფაქტებით ვერავინ ვერ ისაუბრებს, რადგან ასეთი რამ არ ყოფილა.
წინასაარჩევნო დაპირებებზე რას ფიქრობთ? როგორ წარმოგიდგენიათ მათი შესრულება ოპოზიციაში ყოფნის ფონზე?
ნებისმიერი საკითხს, რაც იქნება ქვეყნისთვის მნიშვნელოვანი, მხარი უნდა დაუჭიროს ყველამ, ვისაც საქმის კეთება უნდა და ვისაც ქვეყნისთვის გული შესტკივა. თუ ამას არ გააკეთებენ, ისინი ვიწრო პოლიტიკური ინტერესებიდან ამოდიან და სახელმწიფოებრივად არ აზროვნებენ.
ეს ნიშნავს, რომ სათუოა თქვენი დაპირებების შესრულების საკითხი?
ვერ ნახავთ ვერცერთ დაპირებას, რომელიც გამიცია და არ შემისურლებია. ასეთი დაპირება ბუნებაში არ არებობს. არჩევნებამდეც არ გამიცია არცერთი ისეთი დაპირება, რომელსაც არ მივყევი, არ შევასრულე. თუ რაიმე კითხვის ნიშნები არსებობდა, ასეთი საკითხები არ გამიჟღერებია და არც მათი შესრულების პირობა არ მიმიცია მოსახლეობისთვის.
არჩევნებამდე ამბობდით, რომ გორში, სპორტკომპლექსი, რომელიც 2017 წელს უნდა გახსნილიყო, მუშაობას პანდემიით დაწესებული შეზღუდვების მოხსნისთანავე დაიწყებდა და ამ ობიექტის ფუნქციონირებას ხელს არ შეუშლიდა ლონდონის სასამართლოში მიმდინარე საქმე, სადაც უცხოურმა კომპანიამ სახელმწიფო უწყებას, ამ შემთხვევაში მაშინდელ სპორტის სამინისტროს უჩივლა. ამაზე რას იტყვით?
ამ ობიექტთან დაკავშირებით იყო სერიოზული ტექნიკური წუნი და ხარვეზი შენობასთან დაკავშირებით. არ იყო სათანადოდ მოწყობილი იატაკი, რომლის შეცვლის უზრუნველყოფა პირადად ჩემი ჩართულობით მოხდა. გახსნასთან დაკავშირებით იყო დოკუმენტალური საკითხები, რომლის შესახებ მინისტრთან და მის მოადგილესთან არაერთგზის მქონდა შეხვედრები. ეს საკითხი ფაქტიურად ბოლოში იყო გასული. არაფერი წინ აღარ უდგა. იმედი მაქვს, აღმასრულებელი ხელისუფლება დაასრულებს ამ საქმეს და გაიხსნება გორში სპორტული კომპლექსი და დავესწრებით სხვადსხვა სპორტულ ღონისძიებას ამ შენობაში.
თქვენ წინასაარჩევნო დაპირება იყო ასევე გორის ყოფილი აგრარული ბაზრის ტერიტორიაზე რეკრეაციული ზონის მოწყობა “ქართუ ჯგუფის“ მხარდაჭერით, თუმცა წელიწადი ხდება და იმ ტერიტორიაზე არანაირი სამუშაოები არ მიდინარეობს. ასევე გვპირდებოდით “ქართუ ჯგუფის” დახმარებით, გორის თეატრის რეაბილიტაციას და მას შემდეგ თეატრში აღარავინ მისულა და ხელმძღვანელობას არავინ გასაუბრებია. დღეს რას გვეტყვით ამ დაპირებების შესრულების ეტაპებზე?
ორივე ობიექტთან მიმართებაში სურვილი და ინიციატივა გამოთქმული იყო „ქართუ ჯგუფის“ მხრიდან. ხვდებით ალბათ, რომ ჩემი პოლიტიკური შეხედულებებიდან გამომინარე, მე მთთან აქტიური კომუნიკაცია აღარ მაქვს. შეგიძლიათ შეეხმიანოთ „ქართუ ჯგუფს“ და კითხოთ, რა პოზიცია აქვთ და რას გეგმავენ.
ეს ნიშნავს, რომ ეს თქვენი პირადი დაპირება არ ყოფილა და ამაზე მათგან მიღებული ინფორმაციის შედეგად საუბრობდით?
როდესაც ამ საკითხებზე ვსაუბრბობდი, ხაზგასმით აღვნიშნავდი, რომ ეს იყო “ქართუ ჯგუფის” დაპირება. თეატრზე შემიძლია გითხრათ, რომ არაერთხელ ჩემი ინიციატივით ჩამოვიყვანე სპეციალისტები და იწყებოდა არქიტექტურული სამუშაოები. რაც შეეხება ყოფილი ბაზრის ტერიტორიას, „ქართუ ჯგუფმა“ კერძო პირისგან გამოისყიდა ეს ობიექტი და გადასცა სახელმწიფოს. ამ პროცესის მიდევნება ჩემი მხრიდან ახლა უკვე ბუნებრივია ვეღარ მოხდებოდა.
ერთ-ერთი თქვენი წინასაარჩევნო დაპირება ეხებოდა მშვიდობისა და სტაბილურობის შენარჩუნებისთვის ხელშეწყობას. როგორ წარმოგიდგენიათ რუსეთთან ურთიერთობა და მცოცავი ანექსიის შეჩერება?
ჩვენ გუნდს აქვს თავისი ხედვა და გეგმა ამ საკითხის შესახებ და აქტიურად ვიწყებთ დეოკუპაციის სტრატეგიაზე მუშაობას. უახლოეს პერიოდში, საზოგადოებისთვის გახდება ცნობილი ჩვენი კონკრეტული ხედვების შესახებ.
დასასრულს, წინასაარჩევნო მოლოდინებზეც გკითხავთ. სხვათაშორის “ოცნების” გორის ოფისში ამბობენ, რომ გახარიას გუნდს „ნაიონალური მოძრაობაც“ კი აჯობებს.
რასაც ვფიქრობდი 2020 წლის საპარლამნტო არჩევნებამდე და ვამბობდი, იგივეს… მაშინაც ვთქვი, რომ დიდი უპირატესობით გავიმარჯვებდი, ახლაც იგივეს ვფიქრობ ჩვენს კანდიდატზე. როგორც მაშინ არ გაჩენილა არცერთი კითხვა და ხარვეზი ჩემს გამარჯვებასთან დაკავშირებით, ასე იქნება ახლაც. გორის მუნიციპალიტეტში ჩვენი გუნდი დამაჯერებლად გაიმარჯვებს. ვინ იქნება ჩვენი კანდიდატი, ამას უახლოეს პერიოდში გაიგებს საზოგადოება.
