სულ მალე, ქალაქ ხაშურში, დიმიტრი ყიფიანის სახელობის სკვერში, დიმიტრი ყიფიანის ბიუსტიც დაიდგმება, – განაცხადა ხაშურის მერმა დღეს, ქვიშხეთში “ყიფიანობის” სახალხო დღესასწაულზე ყოფნისას.
“ვამაყობთ, რომ დიმიტრი ყიფიანი ჩვენი თანამემამულეა. იგი გახლავთ ქართველი ერის ერთ-ერთი ყველაზე პატივსაცემი და საამაყო საზოგადო მოღვაწე. სასიხარულოა, რომ ჩვენი დიდი მამულიშვილის – დიმიტრი ყიფიანის სახლ-მუზეუმი რეაბილიტირებულია და ღირსეულად შეუძლია ვიზიტორების მიღება”, – აღნიშნა ხაშურის მერმა.
სახალხლო დღესასწაული დიმიტრი ყიფიანის სახელობის სახლ-მუზეუმში აღინიშნა. ღონისძიებაში სხვადასხვა მუნიციპალური შემოქმედებით ჯგუფები მონაწილეობდნენ.
სახალხლო დღესასწაულზე, ყიფიანის სახელობის მედლებით დაჯილდოვდნენ კულტურის სამინისტროს მთავარი არქიტექტორი ტარიელ კიპაროიძე და დიმიტრი ყიფიანის სახლ-მუზეუმის მენეჯერი რევაზ ნოზაძე.
ინფორმაციისთვის, დიმიტრი ყიფიანის დაბადებიდან 212 წლისთავისადმი მიძღვნილი ღონისძიება ქვიშხეთში 26 აპრილს გაიმართება. ეს დღე, როგორც სახალხო დღესასწაული, 2003 წლიდან აღინიშნება.
