“ფუსფუსი” ქალებს თავდაცვის უფასო კურსს სთავაზობს, რომლის ფარგლებშიც პირველი რეგიონული შეხვედრა 22 ივლისს გორშია დაგეგმილი.
“ტრენინგებზე გასწავლით, როგორ გამოაღვიძოთ შინაგანი მებრძოლი, აიმაღლო თავდაჯერებულობა და სახიფათო სიტუაციებს მობილიზებული დაუხვდე – ამიტომ არ გაუშვა ხელიდან ეს უძვირფასესი კურსი და ახლავე დარეგისტრირდი”, – წერია “ფუსფუსის” განცხადებაში.
კურსის გავლის მსურველებს რეგისტრაციის გავლა შეუძლიათ ბმულზე: https://forms.gle/q2LWBbqCZesMdvd9A
“ფუსფუსის” განცხადებით თავდაცვის კურსი იმ გამოწვევების საპასუხოდ შეიმუშავეს, რომლის წინაშეც საქართველოში მცხოვრები ქალები დგანან.
“საქართველოში ქალებზე და გოგონებზე ძალადობა [იგივე გენდერული ნიშნით ძალადობა] კვლავ დიდ გამოწვევად რჩება და სტატისტიკაც შემზარავია. სწორედ ამიტომ, ფუსფუსში გადავწყვიტეთ ფიზიკური და ფსიქო-ემოციური თავდაცვის კურსების ორგანიზება. შარშან ეს მხოლოდ თბილისში მოვახერხეთ, წელს კი დამატებით 5 ქალაქსაც მოვივლით”, – ამბობენ ორგანიზაციაში.
კურსის განმავლობაში იგეგმება ისეთი საკითხების განხილვა, როგორიცაა:
- ძალადობის ფორმებს: პირდაპირი და ირიბი/ფსიქოლოგიური;
- მოძალადის მოტივებს და ქცევის პატერნებს;
- ძალადობის გამოცდილებასთან დაკავშირებულ მდგომარეობებს;
- სხეულის საპასუხო რეაქციებს ექსტრემალურ სიტუაციებში და თავდასხმისას;
- სიტუაციურ შემთხვევებს (მაგ. ქუჩაში, ტრანსპორტში, ბარში, დეითზე) და შესაძლო გამოსავლებს;
- გავაკეთებთ სხეულისა და ხმის ფლობისა სავარჯიშოებს; გავერკვევით ‘Body language’-სა და სახის მიმიკების მნიშვნელობაში;
- ვისწავლით თავდაცვის ეფექტურ ილეთებს, რომელიც შესაძლებელს გახდის საკუთარი თავის/სხეულის დაცვას სპეც.ფიზიკური მომზადების გარეშეც;
- განვიხილავთ თავდაცვის საშუალებებს/ყოველდღიური მოხმარების ნივთებს და მათი გამოყენების ხერხებს;
- მოგაწვდით ინფოს სხვადასხვა საჭირო აპლიკაციებსა და სერვისებზე.
“კურსის მიზნებია საკუთარი თავისა და გარემოს შეცნობა/ანალიზი, თავდაჯერებულობის ამაღლება, შინაგანი შინაგანი მებრძოლის გამოღვიძება, პოტენციურად ‘სახიფათო’ სიტუაციების ამოცნობა, ვერბალური და ფიზიკური თავდაცვა და ინსტინქტური თავდაცვითი მექანიზმების გამოფხიზლება”, – ვკითხულობთ ორგანიზაციის განცხადებაში.
თავდაცვის კურსის გავლა შეუძლიათ 16+ ასაკის გოგონებს. გორში შეხვედრა 22-23 ივლისაა დაგეგმილი:
- შაბათი: 14:00 -18:00
- კვირა: 14:00 -18:00
“ინფორმაციას ლოკაციასა და სხვა დეტალებზე შერჩეული მონაწილეები მეილზე მიიღებენ. კურსს გაუძღვებიან ფსიქოლოგები და საბრძოლო ხელოვნება – Krav Magaს ინსტრუქტორები. ინიციატივა ხორციელდება “ნიდერლანდების საელჩო საქართველოში” ფინანსური მხარდაჭერით”, – აღნიშნავენ “ფუსფუსში”.
