გორის მერია სამოქალაქო ბიუჯეტის ახალგაზრდული კლუბის წევრების შესარჩევ კონკურს აცხადებს. კონკურსში მონაწილეობა გორის მუნიციპალიტეტში რეგისტრირებულ, 18-დან 30 წლამდე ასაკის ახალგაზრდებს შეუძლიათ.
მერიის განცხადებით, კლუბი საინფორმაციო კამპანიის “მე ვგეგმავ ჩემი მუნიციპალიტეტის ბიუჯეტს” ფარგლებში ყალიბდება.
“საინფორმაციო კამპანიის მიზანია გორის მუნიციპალიტეტის მოსახლეობის ცნობიერების ამაღლება, სამოქალაქო პასუხისმგებლობის დონის გაუმჯობესება/ამაღლება და მოქალაქეთა მონაწილეობის გაზრდა მუნიციპალიტეტის ბიუჯეტის დაგეგმვის პროცესში, ახალგაზრდების ჩართულობა მუნიციპალიტეტის საქმიანობაში”, – ნათქვამია მერიის განცხადებაში.
შერჩეულ ახალგაზრდებს ექნებათ შესაძლებლობა ტრენინგების საშუალებით აიმაღლონ ცოდნა შემდეგი მიმართულებით:
- ადგილობრივი თვითმართველობის კომპეტენციები;
- მოქალაქეთა მონაწილეობის მექანიზმები ადგილობრივი თვითმმართველობის საქმიანობაში;
- კომუნიკაცია და პრეზენტაციის უნარები.
საინფორმაცია კამპანიას გორის მუნიციპალიტეტის სტრატეგიული განვითარების სააგენტო, გორის მუნიციპალიტეტის საკრებულოსა და გორის მუნიციპალიტეტის მერიასთან ერთად ახორციელებს.
კონკურსში მონაწილეობის მსურველებს განაცხადის შევსება შეუძლიათ ბმულზე: სააპლიკაციო ფორმა
