“იმოგზაურე, სადაც ცხოვრობ” – ასე ჰქვია პროექტს, რომლის ფარგლებში გადაღებული ერთ-ერთი ვიდეო მნახველს გორის ზედა ხედიდან ქალაქის სიღმეში მიუძღვება.
გიორგი ხელაშვილმა და მარიამ სეხნიაშვილმა ვიდეოს გადაღებისთვის გორში ერთი კვირა გაატარეს.
“მარიამი გორიდან არის, მე რუსთავიდან და როცა ეს პროექტი “იმოგზაურე, სადაც ცხოვრობ” დავიწყეთ, ჩვენი სურვილი იყო სწორედ ჩვენი ქალაქები გადაგვეღო პირველად”, – უთხრა რადიო “მოზაიკას” გიორგიმ.
ის და მისი ახალგაზრდა მეუღლე დრონით გორის კადრებს ერთი კვiრის განმავლობაში იღებდნენ. გიორგი იხსენებს, რომ გადაღებები ზამთრის პერიოდს დაემთხვა და უამინდობის გამო, ხშირად ხელი ეშლებოდათ.
“ზამთრის მიწურული იყო, საკმაოდ ციოდა და გადაღებისას ეს ყველაფერი დიდ დისკომფორტს გვიქმნიდა, რადგან გადაღებები ძირითადად დილის საათებში მიმდინარეობდა. დილის საათებში იმიტომ, რომ ამ დროს იყო ჩვენთვის სასურველი განათებაც და უქარო ამინდიც. უქარო ამინდი, ერთ-ერთი მთავარი პრობლემა იყო გადაღებისას, რადგან დრონს სხვა შემთხვევაში ვერ ვაფრენდით”.
გიორგიმ და მარიამმა გადაღებული მასალა 4 დღეში დაამონტაჟეს და სოციალურ ქსელში გაავრცელეს.
