გორში 9 აპრილის სკვერის რეაბილიტაცია მიმდინარეობს, პროექტის მიხედვით, მოეწყობა მემორიალი, თუჯის სკამები, ბეტონის ფილები და ბორდიურები, – ინფორმაციას გორის მუნიციპალიტეტის მერია ავრცელებს.
უწყების ცნობით, მემორიალი, რომელის ძირითადი მასალაც ლითონია, ეროვნული დროშის ფერებში იქნება წარმოდგენილი.
“ლითონის ფურცლებით დაფარული მსუბუქი კონსტრუქცია დამონტაჟდება მონოლითურ ბეტონის საძირკველზე. ფირფიტებზე დატანილი იქნება 9 აპრილს გარდაცვლილი 21 ადამიანის სახელი და გვარიც. ხელშეკრულების მიხედვით, სამუშაოები მარტის ბოლოს უნდა დასრულდეს”, – ნათქვამია მერიის განცხადებაში.
ინფორმაციისთვის, სკვერი, რომელიც გორში სამეფო ქუჩაზე მდებარეობს, რამდენიმე ათეული წლის წინ 1989 წლის 9 აპრილს საქართველოს დამოუკიდებლობის მოთხოვნით მოწყობილი მშვიდობიანი საპროტესტო აქციის დარბევის დროს გარდაცვლილთა ხსოვნის საპატივსაცემოდ მოეწყო.
