მმართველი პარტიის შემომწირველი კომპანია ხაშურისა და ქარელის მერიების ტენდერებში იმარჯვებს. საუბარია კომპანიაზე “ჰედეფ ჯორჯია”, რომელსაც ერთი წლის განმავლობაში აღნიშნულმა მუნიციპალიტეტებმა 10-მდე ხელშეკრულება გაუფორმა.
2014 წელს რეგისტრირებული “შპს ჰედეფ ჯორჯიას” 100% წილის მფლობელი ლევან გოგოლაძეა, რომელმაც 2021 წლის არჩევნების წინ, 3 აგვისტოს, “ქართულ ოცნებას” 50 000 ლარი შესწირა.
2021- 2022 წლებში, მხოლოდ ხაშურის მერიამ “შპს ჰედეფ ჯორჯიასთან” 10 მილიონამდე ღირებულების ხელშეკრულება გააფორმა.
რაც შეეხება ქარელის მერიას, ამავე პერიოდში აღნიშნულმა კომპანიამ ქარელის ბიუჯეტიდან 6 მილიონ ლარზე მეტი მიიღო.
ორივე მუნიციპალიტეტი აღნიშნულ კომპანიას გზების დაგებისთვის ქირაობს.
აღსანიშნავია, რომ კომპანიის მფლობელი ლევან გოგოლაძე, ხელისუფლების ცვლილებამდე “ერთიანი ნაციონალური მოძრაობის” შემომწირველი იყო. მაგალითად, 2012 წელს მან ენმ-ს 8 000 ლარი გადაურიცხა.
