კასპის მუნიციპალიტეტის მერიას, ორგანიზაციამ “ინფორმაციის თავისუფლების განვითარების ინსტიტუტი” (IDFI) საჯარო ინფორმაციის მოთხოვნით, 30 განცხადება გაუგზავნა. ორგანიზაციის ინფორმაციით, უწყებამ არცერთ განცხადებას არ უპასუხა.
აღნიშნულიდან გამომდინარე, კასპის მუნიციპალიტეტის მერია IDFI-ს ანგარიშში არაანგარიშვალდებული უწყებების ჩამონათვალში მოხვდა.
“2021 წელს, IDFI-ის მიერ ყველაზე დახურულ საჯარო დაწესებულებად შეფასდა საქართველოს კულტურის, სპორტის და ახალგაზრდობის სამინისტრო; აღნიშნული უწყების გარდა, კიდევ 14 დაწესებულება აღმოჩნდა ისეთი, რომელმაც IDFI-ის ყველა განცხადება უპასუხოდ დატოვა, მათ შორის არის კასპის მუნიციპალიტეტის მერია”, – ვკითხულობთ ანგარიშში.
კასპის მერიის გარდა, საჯარო ინფორმაციის მოთხოვნის განცხადებები უპასუხოდ დატოვა ხარაგაულის, წალკის, ნინოწმინდის, მესტიის, თეთრიწყაროს და ბოლნისის მერიებმა.
