ხაშურში საქალაქო კულტურის სახლის რეაბილიტაცია დასასრულს უახლოვდება, – ამის შესახებ ინფორმაციას ხაშურის მერია ავრცელებს.
უწყების ცნობით, ამ ეტაპზე სრულდება როგორც დარბაზის, ასევე, კულისებისა და ადმინისტრაციული ოთახების მოწყობა.
“დარბაზში სრულდება თანამედროვე ტიპის გახმოვანების და განათების სისტემების მონტაჟი შესაბამისი აკუსტიკით. მოწესრიგდა წყლის და კანალიზაციის სისტემები, მოეწყო გათბობა. როგორც საზოგადოებისთვის ცნობილია, ხაშურის საქალაქო კულტურის სახლი ათწლეულების განმავლობაში არ გარემონტებულა, რეაბილიტაციის პროცესი შეფერხებით მიმდინარეობდა, თუმცა, ამ ეტაპზე პროექტი გეგმიურად სრულდება. საქალაქო კულტურის სახლის რეაბილიტაციის შემდგომ ხაშურის მუნიციპალიტეტის კულტურული ცხოვრება ახალ დატვირთვას შეიძენს“, – ნათქვამია მერიის მიერ გავრცელებულ განცხადებაში.
