გორის მუნიციპალიტეტის კულტურის განვითარების ხელშეწყობის სააგენტო 31 დეკემბრის საახალწლო გალა კონცერტისთვის ერთ ჯგუფს და 4 ინდივიდუალურ შემსრულებელს 38 189 ლარს გადაუხდის. უწყებამ უკვე მიმართა შესყიდვების სააგენტოს თხოვნით, რომ კულტურის სააგენტომ შეძლოს ხელშეკრულების გაფორმება ტენდერის გარეშე.
31 დეკემბრის გალა კონცერტისთვის გორის კულტურის სააგენტომ შემდეგი შემსრულებლები შეარჩია: მუსიკალური ბენდი ,,არა” , ინდივიდუალური შემსრულებლები – იოსებ დარბაიძე, ემზარ იორამაშვილი, ვანო მურადელი და მაია ბიძინაშვილი.
“კვლევის შედეგად დადგინდა,რომ წარმოდგენილი შემსრულებლები დიდი პოპულარობით სარგებლობენ გორის მუნიციპალიტეტის მოსახლეობაში და ექსკლუზიურობა დასტურდება მათ მიერ წარმოდგენილი ცნობების საფუძველზე”, – აღნიშნული არგუმენტით ითხოვს კულტურის სააგენტო შესყიდვას ტენდერის გარეშე.
სააგენტო უთითებს, რომ შესყიდვის ღირებულება განისაზღვრა მოლაპარაკებებისა და ურთიერთშეთანხმების გზით.
