ქარელის მუნიციპალიტეტის დაბა აგარაში ამბულატორია გაიხსნება. ამ მიზნით, ყოფილი პოლიკლინიკის შენობის ნაწილი ადგილობრივმა ხელისუფლებამ 10-წლიანი იჯარით ექიმ გოჩა ჩუტკერაშვილს გადასცა.
“აღნიშნულ სიახლეს აგარა-ქვენატკოცის და მიმდებარე სოფლების მოსახლეობა მოუთმენლად ელოდება. კარგია, რომ საკრებულომ ერთხმად დაუჭირა მხარი მისთვის ფართის გადაცემას“, – განაცხადა მურთაზ ცისკაძემ, აგარა-ქვენატკოცის მაჟორიტარმა დეპუტატმა.
ცისკაძის ცნობით, გურამ ჩუტკერაშვილი შენობას თავად გაარემონტებს.
“ამ ამბულატორიაში ადამიანები ყველა საჭირო გამოკვლევის ჩატარებას შეძლებენ და თბილისში და გორში აღარ მოუწევთ სიარული“, – გვითხრა მურთაზ ცისკაძემ.
ინფორმაციისთვის, გოჩა ჩუტკერაშვილისთვის ფართის გადაცემის საკითხი ქარელის საკრებულომ ბოლო სხდომაზე განიხილა. დეპუტატების თანხმობით, მერია 230 კვდრატული მეტრი ფართობის სივრცეს 10 წლის ვადით გაასხვისებს და იჯარის თანხა წლიურად 7 200 ლარი იქნება.
