“სოფლებში გზები მოაწესრიგეთ”, “წყალი არ არის, ჯერ ეს გააკეთეთ”, “დენი ითიშება ყოველდღე”, “ცემენტიან ჰაერს ვსუნთქავთ…”, – ეს იმ პრეტენზიების არასრული ჩამონათვალია, რომლებსაც კასპის მუნიციპალიტეტში მცხოვრები მოქალაქეები ადგილობრივ ხელისუფლებას უყენებენ.
მოქალაქეები პრეტენზიას კასპის მერიის ოფიციალურ გვერდზე ღიად აფიქსირებენ და კასპის მერს მოუწოდებენ ყურადღება მოსახლეობისთვის პრიორიტეტულ საკითხებზე გაამახვილოს.
“სოფლის გზებს მიხედეთ! სოფელი გოსტიბეს მონაკვეთები არის ძალიან გაუვალი ტალახში, დღესაც მანქანა დაზიანდა, როდემდე ვითხოვოთ ამ გზის გაკეთება. არანაირი ხელშეწყობა არ არის, სოფელს რომ დაუბრუნდეს ხალხი. გზა თუ არ არის, ვინ წავა სოფელში საცხოვრებლად? მოხედეთ, გოსტიბეს!“, – წერს ნონა ჯიქურაშვილი.
“წყალი არ არის, დენიც სახვეწარია და ჰაერი, რომელიც ცემენტითაა გაჟღენთილი. დაავადდა ხალხი!“, – წერენ მოქალაქეები.
მოქალაქეთა პრეტენზიების პარალელურად, კასპის მერია საზოგადოებას მუნიციპალიტეტში მიმდინარე და დასრულებული პროექტების შესახებ ინფორმაციას სოციალურ ქსელში უზიარებს – მაგალითად, სოფელ ოკამის, თვალადის, ფერმა-ჩანგილარის ახალი საბავშვო ბაღების მშენებლობის შესახებ, რომელშიც სახელმწიფო ბიუჯეტიდან 7.5 მილიონი ლარი დაიხარჯა.
“სულ რომ ცათამბჯენები დადგათ, არ შეცვლის იმ ფაქტს, რომ არალეგიტიმური მთავრობის წარმომადგენლები ხართ. ოთხი მილიონიდან რამდენი წავიდა შენობაში და რამდენი თქვენს ჯიბეებში ეგაც შემოგვითვალეთ“, – წერს ამ ინფორმაციის პასუხად ერთ-ერთი მოქალაქე.
კაპის მერია მოქალაქეებს ეუბნება, რომ ყველა პრობლემა ეტაპობრივად გადაიჭრება, თუმცა კონკრეტულ ვადებს ვერ ასახელებს.
“ყველგან გაკეთდება, ერთდროულად შეუძლებელია“, – ასე პასუხობს კასპის მერია მოქალაქეთა პრეტენზიებს.
უწყებას ამ დროისთვის საგზაო ინფრასტრუქტურის მოსაწყობად ორი ტენდერი აქვს გამოცხდებული – სოფელ გომიჯვართან მისასვლელი გზის რეაბილიტაციისთვის და კასპში ქეჩარუხისა და ვარჯაანის დასახლებაში სასასფლაოს მისასვლელი გზებისთვის. ამავე მიმართულებით გამარტივებული წესით აქვს ხელშეკრულებები გაფორმებული ინდ.მეწარმე დავით სუხაშვილთან და შპს “საგზაო სამშენებლო #1” -თან, რომლებსაც სოფელ წინარეხში და სასირეთში გზების მოწყობისთვის 30 000 ლარამდე თანხა გადაუხადა.
