გორის რაიონულმა სასამართლომ განიხილა საქმე, რომელიც ეხება პოლიციელების მიმართ სიტყვიერ და ფიზიკურ შეურაცხყოფას.
საქმის მასალების მიხედვით, შუაღამის 02:30 საათზე მთვრალი ა.ხ იმყოფებოდა გორში, წმინდაწყლის დასახლებაში და ერთ-ერთი საცხოვრებელი კორპუსის მიმდებარედ უმისამართოდ იგინებოდა.
“მას წესრიგისგენ მოუწოდეს პოლიციელებმა ა.დ-მ და ვ.ო-მ, რამაც იგი გააღიზიანა და პოლიციელებს მიაყენა, როგორც სიტყვიერი, ასევე ფიზიკური შეურაცხყოფა – ორივე პოლიციელს ხელი დაარტყა სახეში, ხოლო ვ.ო-ს ხელი წაუჭირა ყელში და დაუზიანა სამსახურებრივი პერანგი” , – აღნიშნულია განაჩენის აღწერილობით-სამოტივაციო ნაწილში.
საქმე მოსამართლე გერმანე დადეშქელიანმა განიხილა. როგორც ცნობილია, ბრალდებულმა დანაშაული აღიარა და პროკურატურასა და მას შორის საპროცესო შეთანხმება გაფორმდა.
ა.ხ-ს 1 წლით თავისუფლების აღკვეთა მიესაჯა. საქმეში იყო შემდეგი მტკიცებულებები: ტანსაცმელი, ფეხსაცმელი, ბოთლები და ერთჯერადი ჭიქა, რომელიც მოსამართლის გადაწყვეტილებით, განადგურდა.
