არასამთავრობო ორგანიზაცია PHR – პარტნიორობა ადამიანის უფლებებისთვის გორის რაიონულ სასამართლოში 12 წლის ბავშვის ინტერესებს იცავს. ორგანიზაცია აცხადებს, რომ პროკურატურა ამ საქმესთან დაკავშირებით მიღებულ სასამართლოს გადაწყვეტილებას არ ასრულებს.
“ყველას გვახსოვს 12 წლის ბავშვის ისტორია, ბავშვმა 2021 წლის მაისში ხილი უნებართვოდ დაკრიფა, რის შემდეგაც ხილის მეპატრონეებმა ბავშვი დაამცირეს და მასზე იძალადეს. ისიც გვახსოვს, რომ 2021 წლის 15 ოქტომბერს გორის რაიონულმა სასამართლომ პროკურატურას დარღვევა დაუდგინა და 12 წლის ბავშვის დაზარალებულად ცნობა დაავალა: ერთი პირის მხრიდან დამამცირებელი მოპყრობის, ხოლო მეორე პირის მხრიდან ძალადობის მუხლით” , – აცხადებენ ორგანიზაციაში.
მათივე ცნობით, მიუხედავად იმისა, რომ აღნიშნული გადაწყვეტილების დაუყოვნებელი აღსრულების მოთხოვნით PHR-მა უკვე სამჯერ მიმართა გორის რაიონულ პროკურატურას, ხოლო 2021 წლის 27 ოქტომბერს გადაწყვეტილების შესრულების მოთხოვნით პროკურატურას დამატებით სასამართლომაც მიმართა, გორის რაიონული პროკურატურა დღემდე არ უზრუნველყოფს სასამართლოს გადაწყვეტილების შესრულებას, რითაც არღვევს ეროვნულ და საერთაშორისო კანონმდებლობას და ზიანს აყენებს ბავშვის ინტერესებს.
PHR-ს არგუმენტად კანონმდებლობიდან ერთ-ერთი მუხლი მოაქვს:
საქართველოს კონსტიტუციის 62-ე მუხლის თანახმად სასამართლოს აქტები შესასრულებლად სავალდებულოა. ხოლო სასამართლოს გადაწყვეტილებების შეუსრულებლობა საქართველოს სისხლის სამართლის კოდექსის 381-ე მუხლის თანახმად წარმოადგენს დანაშაულს.
შესაბამისად, 2021 წლის 08 ნოემბერს PHR-მა განცხადებით მიმართა საქართველოს გენერალურ პროკურატურას და ითხოვა გამოძიების დაწყება სასამართლოს გადაწყვეტილების შეუსრულებლობის ფაქტზე და გორის რაიონული პროკურატურის მიერ ბავშვის უფლებების უხეში დარღვევისა და მიკერძოებულობის გამო, სისხლის სამართლის საქმის სხვა სტრუქტურული ერთეულისადმი დაქვემდებარება.
